Good Morning - 583

డబ్బు పోతే - ఫరవాలేదు, 

ఆరోగ్యం చెడితే - ఇబ్బంది, 

కానీ నైతిక విలువలు కోల్పోతే - 

అన్నీ కోల్పోయినట్లే! 

అంతే కదూ.. సంపాదించిన లేదా కూడపెట్టిన డబ్బు అంతా కోల్పోయినా బాధలేదు. మళ్ళీ తిరిగి సంపాదించుకోవచ్చు. ఆరోగ్యం చెడిపోతే - శ్రమించి మళ్ళీ బాగు చేసుకోవచ్చును. కానీ మనయొక్క నైతిక విలువలు కోల్పోతే - అన్నీ కోల్పోయినట్లే. ఇక జీవితకాలం శ్రమించినా - కోల్పోయినవాటిని పొందలేం.. 

Good morning - 582

సంతోషకరమైన జీవితానికి రెండు మాటలు.. 

వస్తువులను వాడండి - కానీ మనుష్యులని కాదు. 

మనుష్యులని ప్రేమించండి - కానీ వస్తువులని కాదు..

నిజమే కదూ... ఈరోజుల్లో మనం ఏమిచేస్తున్నాం ? మనుష్యుల కన్నా వస్తువుల మీద ప్రేమని అదీ అమితమైన ప్రేమని ప్రదర్శిస్తున్నాం.. అవి కొద్దిరోజుల జీవితకాలాన్నే కలిగియున్నా - అంతులేని మమకారాన్ని వాటిమీద చూపిస్తున్నాం.. ఫలితముగా మనుష్యుల మధ్య బంధాలు పలుచన బడుతున్నాయనిపిస్తోంది. గీతలు పడ్డా, క్రిందన పది విరిగిపోయినా, కాసేపు కనిపించకుండా పోయినా.. విలవిలలాడిపోతున్నాం. ఇదంతా ఆ వస్తువులపై ఉన్న ఆపేక్షనే.  అదే మనుష్యులకి -అందునా మనవాళ్ళకి ఏమైనా అయితే - వస్తువుల పట్ల చూపినంత ఆసక్తి, ప్రేమ వారిపట్ల చూపడం లేదేమో అనిపిస్తున్నది.. ఈమధ్య జనాలు ఈ ఎలక్ట్రానిక్ సంబంధిత వస్తువుల మీద మరింతగా వ్యామోహం చూపిస్తున్నారు.

Satyanarayana Swamy Vratham

ఈమధ్య మా బంధువుల వారి ఇంట్లో పెళ్లి జరిగితే.. నేనూ వెళ్లాను. పెళ్ళయ్యాక మరుసటి రోజున రిసెప్షన్ రోజున - ఆరోజు ఉదయాన సత్యనారాయణ స్వామి వ్రతం జరిపారు. పెళ్లి అయ్యాక అన్ని కార్యక్రమాలు ముగించుకొని, వరుడి ఇంటికి బయలుదేరాం.. ఆరోజు అబ్బాయి ఊరిలో బారాత్ చేశారు. డీజే తో నానా హంగామాతో ఆరోజు రాత్రి మూడింటి వరకూ వీధుల్లో డ్యాన్సులు చేస్తూ వరుడింటికి వచ్చాం.. తెల్లారి చాలా ఆలస్యముగా నిద్ర లేచాం అందరమూ.. ముందే నిద్రలేచిన కొద్దిమంది సత్యనారాయణ స్వామి వ్రతానికి కావలసిన ఏర్పాట్లు చేస్తున్నారు. మా గ్యాంగ్ ఏమో ఆ వ్రతానికి కావలసిన సత్యనారాయణ స్వామి వారి పీటకి అలంకరణ చేస్తున్నారు. 

నాకూ చెయ్యాలనిపించింది. ఎప్పుడూ అలా అలంకరణల్లో పాల్గొనలేదు. ఒకసారి చెయ్యాలనిపించింది. ఆకోరికా నేరవేర్చుకోవాలనిపించింది. ఇప్పుడే వస్తాను అని చెప్పేసి, వెంటనే స్నానం చేసొచ్చి, అలంకరణలో కూర్చొన్నాను. అప్పటికే దాదాపుగా అంతా అలంకరణ చేసేశారు. నాకెందుకో అంత బాగా నచ్చలేదు. ఇంకా బాగా అలంకరణ చేస్తే బాగుండేదేమో అనిపించింది. కానీ అప్పటివరకూ చేసిన అలంకరణ కాదని - మళ్ళీ క్రొత్తగా చేసి, అప్పటివరకూ చేసిన వారి అలంకరణ బాగోలేదని అన్నట్లు చేసి, మనసులని బాధపెట్టలేను. పోనీ ఇంకేమైనా జత చేద్దాం అంటే ఊరు క్రొత్త. నాకు కావలసిన వస్తువులు ఎక్కడ, ఎలా, ఎంతకు దొరుకుతాయో తెలీదు. సమయమూ లేదు. క్రొద్దిగా ఇంకా ముందు లేచి పాల్గొంటే బాగుండేది అనిపించింది. ఈసారి నాకా అదృష్టం లేదనిపించింది. 

సరే అని ఊరుకుంటున్న సమయాన నా దృష్టి ఆ పీట మధ్య భాగాన అలంకరించే కలశం మీద దృష్టి పడింది. " దీన్నేమి చేస్తారు? ఎక్కడ పెడతారు?? ఎలా అలంకరించాలని అనుకున్నారు??? ఎవరు అలంకరిస్తారూ????..." లాంటి అక్కడివారిని ప్రశ్నలు వేశాను. 

" స్వామి వారి ఫోటో ముందున వస్తుంది, ఆ రాగి చెంబు మీద పీచు తీసిన కొబ్బరి కాయని పెట్టేస్తారు, ఇంకా ఎవరూ అలంకరిస్తామని అనలేదు.." అన్నారు. 

" ఒకే! నేను అలంకరించాలని ఉంది. ఈ ఒక్కటైనా నాకు వదిలెయ్యండి.." అని అడిగి నేను ఇలా అలంకరణ చెయ్యబోతున్నాను అని కాస్త వివరముగా చెప్పాను. మీకు నచ్చితే - ఆ పని మొదలెడుతాను అని చెప్పా. అలాని ఎందుకు చెప్పాను అంటే - అలా నేను ఎక్కడా చూడలేదు. అలా చేస్త బాగుంటుందని నా ఊహ అంతే. స్వామివారి ముందట ఇలా చెయ్యవచ్చా అన్నదీ నాకు అంతగా తెలీదు.. చేస్తే ప్రశంసలు రాకున్నా సరే - విమర్శలు రాకుంటే సరి అని మనోగతం. వారు, పెద్దవారు సరే అన్నారు. 

చెంబు మూతకు సరిపడా కొబ్బరి కాయని తెప్పించాను. కొద్దిగా జుట్టు పీకేసి, సరిగ్గా అమరేలా చేశాను. దాన్ని చక్కగా కడిగించి, శుద్ధి చేయించాను. అలాగే ఎరుపురంగులో ఉన్న జాకెట్ బట్టని తెప్పించాను. ఆ జాకెట్ బట్టని మడత పెట్టి, టోపీ ఆకారములోకి మార్చాను. దాన్ని ఆ కొబ్బరికాయకి తోడిగేలా చేశాను. 

ఇప్పుడు ఆ ఎరుపురంగు బట్టమీద ఒక అగ్గిపుల్ల సహాయన - పంచపాళీ లోన ఉండే అష్ట కాశీ గంధంలో ముంచి, అమ్మవారి రూపు వెయ్యటం మొదలెట్టాను. మొదట నేను చేస్తున్నది ఎవరికీ అర్థం కాలేదు.. నెమనెమ్మదిగా ఆకారం రూపు దిద్దుకుంటున్న కొద్దీ అందరికీ అర్థం అయ్యింది. మొత్తం గీశాక - రాగి చెంబులో నీటిని నింపి, దానిపైన ఈ అమ్మవారి రూపు ఉన్న కొబ్బరికాయని అమర్చిపెట్టాను. సత్యనారాయణ స్వామివారి ఫోటో ముందు అమర్చాను. అప్పటికే ఆ స్థలాన చాలామంది వచ్చేసి ఉండటముతో బయటకి వచ్చేశాను. 

పూజ అయ్యాక - చాలామంది అలా ఎవరు చేశారు అంటూ ఆరా తీసి, బాగా చేశారు అంటూ మెచ్చుకున్నారు. హమ్మయ్య అనుకున్నాను. ప్రసాదం పంచి పెట్టే బాధ్యత తీసుకొని, వచ్చిన వారందరికీ పంచాను. పనిలోపనిగా నా అలంకరణ తాలూకు ఫోటో ఒకటి తీసుకున్నాను. అదిప్పుడు మీకు చూపిస్తున్నాను. నేను చేసిన - గంధముతో చేసిన అమ్మవారి రూపాన్ని మరొక ఫోటోలో విడిగా చూపిస్తున్నాను. 

Satyanarayana swamy vratham

Kalasham 

ఆంగ్ల పదాలకు తెలుగు పదాలు

ఈ మధ్య తెలుగు దినపత్రికల్లో - ఆంగ్ల పదాలకు బదులుగా తెలుగు పదాలని వాడుతూ తెలుగు భాషని నలుదిశలా విస్తరించటానికి, అలాగే తెలుగు భాషపట్ల ఆసక్తినీ కలుగ చేస్తున్నాయి. ఇలా ఇంగ్లీష్ పదాలకు బదులుగా తెలుగు పదాల ప్రయోగం కొంత క్రొత్తగా, వింతగా ఉన్నా వాడుకలోకి వచ్చాక అది మామూలు పదమైపోతుంది. అలాంటి కొన్ని పదాల సేకరణని ఇక్కడ ఇస్తున్నాను. వీలువెంట మళ్ళీ క్రొత్తపదాల చేర్పు ఉంటుందని తెలియచేసుకుంటున్నాను..

Internet -- అంతర్జాలం 
Cellphone -- సంచారవాణి
Air hostess -- గగనసఖి
Browser -- విహారిణి
Gel -- జిగురు ద్రవం 

Wrong direction -- అపసవ్య దిశ
Refund -- వాపసు చేయటం
Contract workers -- ఒప్పంద కార్మికులు / ఉద్యోగులు
No frills -- శూన్య మొత్తం
Information Technology -- సమాచార సాంకేతిక విజ్ఞాన రంగం 

Outsource -- పొరుగు సేవ
Lubricant -- కందెన
(Dinner) Menu -- (విందు) జాబితా
Mass copying -- మూక చూచిరాత 
Value added services -- విలువ జత చేరిన సేవలు 

Non-convertible debentures -- మార్పిడికి వీలు లేని రుణ పత్రాలు 
BPO (Business process outsourcing) -- వ్యాపార పొరుగు సేవలు 
Board -- నామసూచిక 
Fonts -- ఖతులు 
User name -- వినియోగ నామము 

Password -- సంకేత నామము
Sign board -- నామసూచిక 
Single Window -- ఏక గవాక్షం 
Tablets -- గుళికలు 
Font -- ఖతి 

Account -- ఖాతా 
Touch Screen -- తాకిడి తెర. 
Circle Inspector -- వలయాధికారి / పోలీసు అధికారి 
Add -- చేర్చు 
Eduction officer -- విద్యాధికారి 

Regularization -- క్రమబద్ధీకరణ  
Transformer -- నియంత్రిక 
Contractor -- గుత్తేదారు 
Fire Engine -- అగ్నిమాపక శకటం 
Disturbances -- అవాంతరాలు 

Age Limit -- వయోపరిమితి 
File -- దస్త్రం 
Astronaut -- వ్యోమగామి 

Good Morning - 581

ఆశావాది సమస్యలో జవాబుని ఎదుర్కుంటాడు. 

నిరాశావాది ప్రతి జవాబులోనూ సమస్యలని ఏకరువు పెడతాడు.. 

ఈ సృష్టిలోని ప్రతి ప్రాణి మనుగడలో ఎన్నెన్నో సమస్యలను ఎదురుక్కోవాల్సి వస్తుంది. అలాగే మనిషీ తన జీవన యాత్రలో భాగముగా, ఎన్నో అనునిత్యం ఎన్నెన్నో సమస్యలను  ఎదురుకోవాల్సి వస్తుంది. ఈ ఎదురుకొనే శక్తి అనేది అందరికీ ఒకేలా ఉండదు.. కొందరికి బాగా, మరికొందరికి చాలా తక్కువగానూ ఉంటుంది. చాలామందికి అయితే - పరిస్థితుల ప్రభావం వలన, ఎదురుకొనే సమస్యలను బట్టి అలాంటి సమస్యలను ఎదుర్కొనే శక్తీ, తెలివీ అబ్బుతాయి. ఇది వారిని వారే అప్ గ్రేడ్ చేసుకోవడం లాంటిది. 

సమస్యలను ఎదుర్కోవడంలో ఒక్కొక్కరూ ఒక్కోలా ప్రవర్తిస్తారు.. ఆలోచిస్తారు.. ఎదురుకుంటారు.. పరిష్కరిస్తారు.. అంతిమ విజయం / వైఫల్యం పొందుతారు. నిరాశావాది అనేవాడు సమస్యని పెద్దకొండలా, కొరకరాని కొయ్యలా, మింగుడు పడని విషయంగా భావిస్తాడు. అందుకే సమస్యని పరిష్కరించక, ఏవేవో అర్థంలేని సాకులు చెబుతూ, చేస్తే తప్పక ఓటమిని చవిచూస్తాం అని ఆ సమస్యని ఎదుర్కోక చతికిలపడి, నిరాశా, నిస్పృహలలో లోతుగా మునిగిపోయి ఉంటాడు. ఇలా ఉంటాడు కాబట్టే నిరాశావాది ( నిరాశతో వాదించేవాడు ) అన్నారు కాబోలు. ఇలా ఉండే వారితో ఉంటే - ఆర్నెల్లు సహవాసం చేస్తే - వారు వీర అవుతారు, వీరు వారవుతారు - అనే సామెతలా వారి ఆలోచనా తీరు మనమీద బాగా ప్రభావం చూపిస్తుంది. మనమూ నెమనెమ్మదిగా వారిలా మారిపోతాం. తస్మాత్ జాగ్రత్త.. అలా మీచుట్టూ ఉన్న సమూహంలో ఎవరైనా ఉంటే వారిని ముందుగా మార్చే ప్రయత్నం చెయ్యండి. అన్నట్లు ఇలాంటివారు మన సమూహంలో ఉంటే ఒక లాభం కూడా ఉందండోయ్.. ఏదైనా పని, ప్లాన్, ఆలోచన గానీ చేస్తుంటే - వారు అందులో ఉన్న సమస్యలన్నీ ''వారి తెలివితో'' పసిగట్టి, నిరాశతో అవేమిటో చెబుతారు. కానీ ఆ విషయాలని వారితో వాదించక - వాటిని ఎలా ఎదురుక్కోవాలో ఆశావాదులతో చర్చించాలి. అప్పుడు ఆ సమస్యలో ఉన్న జవాబును తెలుసుకుంటాం. 

ఆశావాదులు మాత్రం తాము ఎదుర్కోబోయే ప్రతి సమస్యలో  జవాబుని వెదుకుతారు. నిజానికి ప్రతి సమస్యలో సగం పరిష్కారం ఉంటుంది. ఉదాహరణకి : నేను ఈ పరీక్ష ఎలా పాస్ అవ్వాలి ? అని అనుకుంటే ఆ పరీక్షకి ఏమి చేస్తే ఆ పరీక్ష అనే సమస్యని అధిగమించగలం అని తెలుసుకొని, ఆ దిశగా గట్టి ప్రయత్నం చెయ్యాలి. ఇలా ప్రతీ సమస్యని - ఆ సమస్యని దాటగలిగేట్లుగా ఒక చక్కని పరిష్కారాన్ని ఆలోచించగలిగేవాడే ఆశావాది. ఇందుకోసం ఒక్కోసారి ధైర్యముగా ఎదురోడ్డాల్సి ఉంటుంది.. లేదా తగ్గాల్సివస్తుంది. నా దృష్టిలో -

తక్కువ సమయంలో, తక్కువ ఖర్చులో, తక్కువ నష్టంతో -  ఎక్కువ ఫలితాన్ని పొందేవాడే అసలైన వీరుడు. అలాంటివారే జీవితాన్ని వారు అనుకున్నట్లు పొందుతారు. కానీ,ఈరోజుల్లో సమస్యలని మరింత జటిలం చేసుకొనేవారు ఎక్కువయ్యారు. చిన్న చిన్న విషయాలకే లేనిపోని ఆహాలకు పోయి, పట్టింపులవల్ల మరింతగా సమస్యలను ఇబ్బందికరంగా  చేసుకుంటున్నారు.. 

Quiz

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

.

జవాబు : 

Orkut లోని Ortist ని వాడి బొమ్మలు గీయటం.

ఆర్కుట్ అనే సోషల్ నెట్వర్క్ సైట్ ని మూసేశారని మీకు తెలిసిన విషయమే..అందులో కొన్ని బొమ్మలని వేశాను.. Ortist అనే అప్లికేషన్ తో, మౌస్ ని కదుపుతూ వాడుతూ బొమ్మలని గీసుకోవచ్చును. ఇలా వేసుకున్న వాటిని ప్లే ( Play ) చేస్తే - ఎలా వేశామో అలా ఒక వీడియోగా కనిపిస్తుంది. ఓహో! ఇలా వేశారు, అలా వేస్తే ఈ బొమ్మ వస్తుంది.. అని తెలుసుకొనేలా ఉంటుంది - ఈ పద్ధతి. అప్పట్లో ఇలా చాలానే చిత్రాలు వేశాను. క్రొత్తలో కాబట్టి ఇందులో బాగా మమేకమైపోయాను. అలాగీసుకున్న ఒక అసంపూర్తి చిత్రాన్ని మీకు ఇక్కడ చూపిస్తున్నాను. 

ఆర్కుట్ లోని నా క్రియేషన్స్ కాలగర్భములో కలసిపోకుండా, ఇలా నా బ్లాగులో దాచుకొనే ఒక చిన్న ప్రయత్నం ఇది. ఇలా గీసుకున్న చిత్రాల్లో ఇదొక్కటే దాచుకున్నాను.. మరెన్నో చిత్రాలు అలా కాలగర్భములో కలసిపోయాయి.. ప్చ్!. 

ఇలా గీసుకున్న ఇంకొన్ని చిత్రాలు చాలానే ఉన్నాయి. వాటిని ఇక పోస్ట్ చెయ్యలేను.. కారణం : ఆ సోషల్ సైట్ ని మూసేసారని ముందే మీకు తెలియచేశాను. వాటిని ఈ బ్లాగులో సేవ్ చేసుకోవటం మరిచాను. ఇలా కంప్యూటర్ మౌస్ వాడి గీసుకున్న చిత్రాలని అందరికీ చూపించుకోవటంలో ఆ తృప్తియే వేరు.. ఇప్పుడు ఆ అప్లికేషన్ మిగతావాటిల్లో ఉందో, లేదో నాకు అంతగా తెలీదు. నాకు మిగిలిన ఏకైక Ortist స్కెచ్ ఇదొక్కటే. ఈ క్రిందున్న వీడియోని ప్లే చెయ్యండి. ఎలా గీశానో మీకూ తెలుస్తుంది. క్రిందన కుడి మూలగా Speed అనే స్లైడ్ అడ్జస్ట్ బటన్ ఉంటుంది. దాన్ని ముందుకూ, వెనక్కి జరుపుకొని కావలసిన వేగములో ఆ వీడియోని చూడవచ్చును. 

దీన్ని నేను 19 - ఫిబ్రవరి - 2009 న 5:55:34 A.M కి గీయటం పూర్తిచేసి, పోస్ట్ చేశాను. ఇప్పుడైతే మరింత బాగా గీసేవాడిని.. ఇది శివరాత్రికి నా మిత్రులకు - శుభాకాంక్షలు తెలియచెయ్యటానికి ఈ ప్రయత్నం చేశాను.. కానీ సమయం చిక్కకనో, మరే కారణం వల్లనో ఇంకా బాగా వెయ్యటానికి ప్రయత్నించలేకపోయా..