Friday, September 8, 2017

Koodali Aggregator

ఇందాక నా బ్లాగ్ తెరచి, అప్రూవ్ చెయ్యాల్సిన కామెంట్స్ ఏమైనా ఉన్నాయేమో అని తెరిచా.. ఒక కామెంట్ అప్రూవ్ చెయ్యడానికి రెడీగా ఉంది. అందులో నా బ్లాగ్ ని కూడలి.క్లబ్ నందు కలిపారని ఉంది.

కూడలి.క్లబ్ అనేది బ్లాగర్ అగ్రిగేటర్.. అంటే - అగ్రిగేటర్ అనేది ఒక వెబ్సైట్ లా గానీ, ఒక ప్రోగ్రాం లా గానీ ఉండి, వివిధ బ్లాగుల పోస్ట్స్ ని వెనువెంటనే ఒకేచోట సమాహారముగా చూపిస్తూ, లేదా ఆయా బ్లాగుల లింకులను ఒకేచోట చూపించేది - అని అర్థం. ఇందులో చేరితే, లేదా మన బ్లాగ్ ని వీటిల్లో చేరిస్తే మనం మన బ్లాగుల్లో వేసే పోస్ట్స్ లింక్స్ అన్నీ అందులో చేరుతాయన్నమాట. ఆయా పోస్ట్స్ తాలూకు మొదటి రెండులైన్స్ నీ చూపిస్తూ, మీ పేరునీ లింక్ గా చూపిస్తుంది. దాన్ని నొక్కితే ఆయా బ్లాగ్స్ కి నేరుగా వెళ్ళొచ్చు. నా బ్లాగ్ అభివృద్ధిలో భాగం పంచుకోబోతున్న కూడలి.క్లబ్ వారికి చాలా కృతజ్ఞతలు తెలియచేసుకుంటున్నాను. ఆ అగ్రిగేటర్ లింక్ : http://koodali.club/ 

ఇక బాధాకరమైన విషయం చెప్పాలీ అంటే - నా బ్లాగ్ అభివృద్ధిలో / ప్రఖ్యాతిలో గూగుల్ వాటా తరవాత కూడలి దే ప్రముఖస్థానం. అందులో చేరాక నా బ్లాగ్ విశ్వవ్యాప్తముగా త్వరగా చేరుకోవటం మొదలయ్యింది. నా బ్లాగ్ కి వచ్చే పేజీ వ్యూస్ లలో ఆగ్ర తాంబూలం మాత్రం - ఈ కూడలి మరియు మాలిక అగ్రిగేటర్స్ దే.. గత కొంతకాలముగా నా బ్లాగ్ హోం పేజీలో ఉండే స్టాటిస్టిక్స్ Statistics విభాగములో ట్రాఫిక్ సోర్సెస్ Traffic Sources నందు చూస్తే - ఈ కూడలి వారి నుండి ఎలాంటి బ్లాగ్ ట్రాఫిక్ వివరాలు కనిపించటం లేదు.


అలా ఎందుకు జరిగిందో తెలీదు. ఎవరిని అడగాలో కూడా తెలీదు.. తెలుగు బ్లాగర్స్ గ్రూప్ లో ఏమైనా అప్డేట్ ఉందేమో అని చూశా.. ఏమీ కనిపించలేదు. ఆ తరవాత ఆ సైటు కి నేరుగా వెళ్లి చూశా.. ఇలాగ ఒక మెసేజ్ కనిపించింది.


అలా కనిపించింది. స్పష్టమైన కారణం అక్కడ కనిపించకున్నా నాకు వచ్చిన పోస్ట్ కామెంట్ వల్ల కారణం ఇదా అని తెలుసుకున్నాను. అలాంటి కూడలి అగ్రిగేటర్ అస్తమించారని తెలిసి, బాధవేసింది... ఈ విషయం నిజమా కాదా అని తెలుసుకోవటానికి నాకు మరే మార్గమూ కనిపించట్లేదు.. ఈ వార్త ఎంతవరకూ నిజమో కూడా తెలీదు. కేవలం ఆ పోస్ట్ కామెంట్ మాత్రమే ఆధారం. ఇదంతా ఇక్కడ ప్రస్తావించటం ఎందుకూ అంటే - నా బ్లాగ్ అభివృద్ధిలో ఆ సైట్ యొక్క పాత్ర చాలా ఉంది. ఇలాంటి సమయాల్లో కూడా తనని ఒకసారి కూడా గుర్తుచేసుకోకపోతే నా అంత కృతఘ్నుడు మరొకడు ఉండడు. 

తనని మొదటిసారిగా హైదరాబాద్ లో జరిగిన తెలుగు బ్లాగర్స్ మీటింగ్ లో కలిశాను. ( https://achampetraj.blogspot.in/2012/12/bloggers-meeting-2012.html ) అప్పుడే తొలిసారి పరిచయం. సన్నగా, పొడుగ్గా ఉన్న అతను తనని తాను వీవెన్ గా పరిచయం చేసుకున్నారు. అదే తొలిసారిగా, కడసారిగా చూడటం. అప్పటికే తను ప్రత్యక్ష పరిచయం లేకున్నా - అంతర్జాలములో తను తెలుగు బ్లాగర్స్ గ్రూప్ కీ, తెలుగు టైపింగ్ వ్యాప్తికీ, వీకీపీడియా లో తెలుగు వ్యాసాలు పెరగాలన్న తలంపుతో - చాలా ప్రయత్నాలు ఒంటరిగా చేసి, అమోఘమైన విజయం సాధించారు. తెలుగులో ఉన్న " వీవెనుడి టెక్నికులు " అనే బ్లాగ్ - బ్లాగ్ ప్రారంభించిన తొలినాళ్ళలో చాలా బ్లాగర్స్ కి పెద్దబాల శిక్ష అని అనడంలో ఏమాత్రం సందేహం పడక్కరలేదు. అంతర్జాలములో తెలుగుని అచ్చురూపములో పెంపొందించేందుకు మరికొందరితో కలసి చాలా శ్రమించారు. కానీ ఎక్కడా నేను ఇదంతా చేశాను అని ప్రకటించుకోని నిగర్వి ఆయన. చాలామంది వాడే " లేఖిని " ( www.lekhini.org ) అనే తెలుగు టైపింగ్ టూల్ నీ అందుబాటులోకి తీసుకవచ్చిందీ ఆయనే. అంతర్జాలములో తెలుగు భాషకి ఎనలేని సేవ చేశారు.

ఒకసారి బ్లాగర్స్ మీటింగ్ లో నేను తనని కలిసాను అని అన్నానుగా.. అప్పుడు ప్రతి బ్లాగర్ తన గురించి చెబుతూ - తాను అంతర్జాలములో ఏమేమి చేస్తున్నారో చెప్పాల్సిందిగా కోరినప్పుడు - నా వంతు వచ్చినప్పుడు నేను లేచి - నా బ్లాగ్ గురించీ, తెలుగు టైపింగ్ గురించీ, తెలుగు వీకీపీడియాలో ఉన్న కంటెంట్ ని తప్పొప్పులు సరిదిద్దడం, క్రొత్తగా మరింత విషయాన్ని చేర్చడం గురించి నేను చెప్పినప్పుడు తను నన్ను కరతాళ ధ్వనులతో మెచ్చుకున్న సందర్భం ఇప్పటికీ నాకు గుర్తుంది. చివరిగా సభ అధ్యక్షోపన్యాసం ఇస్తూ - అంతర్జాలములో తెలుగు వ్యాప్తికి మీకు తోచిన సలహాలు, సూచనలు ఇవ్వమని కోరితే నేనూ కొన్ని చెప్పా.. కానీ అవి ఆదరణకు నోచుకోలేదు. అప్పుడే నాకు మదిలో మెలిగిన ఒక ఐడియా ని నా బ్లాగ్ ద్వారా మొదలెట్టాను. నా బ్లాగ్ లో తెలుగు టైపింగ్ ని ఎలా వ్రాయాలో పాఠాలు మొదలెట్టాను. ఇవి " తెలుగులో టైపింగ్ చెయ్యడం ఎలా? - పాఠాలు " ( https://achampetraj.blogspot.in/search/label/%E0%B0%A4%E0%B1%86%E0%B0%B2%E0%B1%81%E0%B0%97%E0%B1%81%E0%B0%B2%E0%B1%8B%20%E0%B0%9F%E0%B1%88%E0%B0%AA%E0%B1%81%20%E0%B0%9A%E0%B1%86%E0%B0%AF%E0%B1%8D%E0%B0%AF%E0%B0%A1%E0%B0%82%20-%20%E0%B0%AA%E0%B0%BE%E0%B0%A0%E0%B0%BE%E0%B0%B2%E0%B1%81 ) అనే లేబుల్ క్రిందన కనిపిస్తాయి. ఈ పాఠాలకు  ప్రేరణ అంతా తానే...


తన ప్రయత్నాల వల్ల తెలుగు బ్లాగ్స్ ఎంతో ఖ్యాతిని పొందాయి. నా బ్లాగ్ కూడా తను చేసిన సహాయం వల్ల చాలామందికి చేరువైంది. తరవాత ఆయన ఆబిడ్స్ లోని గోల్డెన్ త్రెషోల్డ్ లో ఎన్నో సమావేశాలు నిర్వహించినా - నాకు సమయం కుదరక వెళ్ళలేకపోయా..

ఆయన ఆత్మకు శాంతి చేకూరాలని కోరుకుంటున్నాను.


2 comments:

విష్వక్సేనుడు said...

Oh.. Well written Sir. Thanks for the post 💐💐

RAJ A said...

ధన్యవాదములు..

Related Posts with Thumbnails