Tuesday, February 24, 2015

Nampelli Gutta, Vemulawada.

నాంపెల్లి గుట్ట  Nampelli Gutta - వేములవాడ పట్టణానికి నాలుగు కిలోమీటర్ల దూరములో - కరీంనగర్ వెళ్ళే రహదారికి ప్రక్కగా ఉంటుంది. నాంపెల్లి గుట్ట ఎత్తుగా, ఆహ్లాదకరముగా ఉండి, పర్యావరణ ప్రియులకు ఒక టూరిస్ట్ స్పాట్ గా విరాజిల్లుతున్నది. ఇక్కడ ఉన్నది - ప్రధాన ఆలయం - శ్రీ లక్ష్మీ నరసింహ Sri Lakshmi Narasimha Temple ఆలయం. ఇది ఆ ఎత్తైన గుట్టమీద ఉన్నది. 

ఈ క్రింది ఫోటోలో కనిపిస్తున్నదే ఆ గుట్ట మీదకు వెళ్ళే ప్రధాన రహదారి మీద ఉన్న కమాన్. దీని గుండా లోపలి వెళ్ళాలి. 

కొద్ది దూరములోనే ఇలా ఒక టోల్ గేట్ ఆఫీస్ ఉంటుంది. ఇక్కడ నలుగు చక్రాల వాహనానికి పది రూపాయలు రుసుము వసూలు చేస్తారు. 


ఇలా కొన్ని గుట్టలు కనిపిస్తాయి. 


గుట్ట మీదకు వెళ్ళటానికి ఇలా సిమెంట్ రహదారి ఉంటుంది. 







అలా వెళ్ళాక దారిలో ఇలా కాళీయ మర్ధనుడి నిర్మాణం కనిపిస్తుంది. 


దగ్గరకు వచ్చాక ఆ నిర్మాణం ఇలా ఉంటుంది.  ( దీని విశేషాలు వేరొక టపాలో చెబుతాను )


అక్కడి నుండి నేరుగా వెళ్ళితే, ఇలా నాంపెల్లి గుట్టకి వెళతాము. 


అక్కడి ప్రకృతి రమణీయత. 



నాంపల్లి గుట్ట వద్ద నుండి శ్రీకృష్ణుడి కాళీయ మర్ధన విగ్రహం. 


గుట్ట వద్ద నుండి వేములవాడ పట్టణం. 




గుట్ట ప్రక్కనే ఉన్న నీటి కొలను.. 



గుట్ట మీదకి వచ్చే రహదారి.


ఇక్కడికి వచ్చాక వాహనాలు పార్క్ చేస్తారు. 


ఇక - ఇక్కడి నుండి నడక మార్గాన ఆ కనిపించే మెట్ల దారి మీదుగా ఆ గుడికి వెళ్ళాలి. 


ఇలా సిమెంట్ మెట్ల మీదుగా పైనున్న గుడికి వెళ్ళాలి. 



ఈ సిమెంట్ మెట్లు వెయ్యక ముందు - గుట్టని తొలచి, రాత్రి మెట్లు వాడుకలో ఉండటం చూడవచ్చును. 


 

సిమెంట్ మెట్లు.



గుట్ట మీదుగా చూస్తే - క్రిందన ఉన్న నాంపెల్లి అనే ఊరు. దూరముగా కనిపిస్తున్నది వేములవాడ పట్టణం. 


దూరముగా కాళీయ మర్ధనుడి ఆలయ నిర్మాణం. 


గుట్టమీదకి మెట్లు. 


గుట్ట మీదున్న ఆలయం. 





ఇది ఆలయానికి ముందున్న రాతి స్థంభం. దీని మీద ఒక పళ్ళెం ఉంచారు. భక్తులు ఏదైనా నాణెం చేతిలోకి తీసుకొని,  మనసులో ఏదైనా కోరిక మ్రొక్కుకొని అందులోకి విసిరేస్తే, పడితే ఆ మ్రొక్కిన కోరిక నెరవేరుతుందని ఇక్కడి భక్తుల నమ్మిక. 


ఆలయ ప్రక్క భాగం. 



ఆలయ వెనక భాగంలో ప్రదక్షిణాల కోసం మెట్లు. 




ఆలయానికి ఆనుకొని ఉన్న చిన్నపాటి రాతి గుట్ట. 



ఆలయ ఎడమ భాగం. 



Friday, February 20, 2015

Good Morning - 576


అన్నయ్య, సోల్ మేట్, అక్కయ్య, బాస్, బాబాయ్, గైడ్, మెంటార్, గురు.. ఇలా మీకు నచ్చిన ఏ పేరైనా పెట్టుకోండి. మీకంటే విద్యాధికుడు అయిన శ్రేయోభిలాషి ఒకరిని ఎంచుకోండి. మీ ఆలోచనలు, భయాల్నీ ఆ వ్యక్తితో పంచుకోండి. మనసు విప్పి మాట్లాడండి. కేవలం పంచుకోవడం ద్వారానే చాలా ఒత్తిళ్లు దూరమవుతాయి. 

అవును.. అక్షరాలా నిజం.. ఎవరికీ వారు యమునా తీరే అన్నట్లు ఉన్న ఈరోజుల్లోని మానవ సంబంధాలలో ఒత్తిడి క్రమేపీ పెరుగుతున్నది. మన మొబైల్ ఫోన్ లో ఎన్నో కాంటాక్ట్ పర్సన్స్ ఒక్క రింగ్ దూరములో ఉన్ననూ , మన సామాజిక సైట్లలో వందలాది స్నేహితులున్నా.. మనసుకి గిరి గీసుకొని కూర్చుంటున్నాం. మన ఊసులు చెప్పుకోవడానికి, మన విషయాలనీ, విజయాలనీ, బాధల్నీ, మన ఆలోచనలనీ.. అన్నింటికన్నా మనలోపలి మనని - చాలా నమ్మకమైన వారితో, స్వేచ్చగా భావప్రకటన చేసుకోలేక పోతున్నాం. అందుకు గల కారణాలలో - మనకి చుట్టూరా ఉన్న వారిలో అలా మనసుని కలిపేసి, మనల్ని మనం ఆవిష్కరించుకోవాల్సిన వ్యక్తి మన దరిదాపుల్లో కనిపించక పోవటం వల్లనే. వారిలో మనం అనుకున్న లక్షణాలు వారిలో కనిపించక పోవటం వల్లనే అలా - "జగమంత కుటుంబం నాది.. ఏకాకి జీవితం నాది.." అన్న స్థాయిలో మనం ఉంటాం. 

మనం చెప్పే ఊసులూ, విషయాలు, పంచుకొనే భావజాలం అంతా మనం వారి వద్ద స్వేచ్చగా, చిన్న పిల్లాడిలా చెప్పుకున్నా వాటన్నింటినీ తనలోనే దాచుకొని, మన ఆలోచనల్లో, నడతలో, చేసే పనుల్లో ఏమైనా తప్పులు ఉంటే నిజాయితీగా, నిర్భయముగా సరిదిద్దగలిగే - విద్యాధికులైన వ్యక్తి సహచర్యం లభిస్తే - అంతకన్నా కావల్సిందేముంది.. వారితో గడపడం ఎంతో హాయిగా ఉంటుంది. అదే సమయాన వారి పట్ల మనలో ఉన్న విలువ వల్ల గౌరవంగా చూసుకుంటాం. ఒక్కోసారి వారి కంటికి - శరీరం బాగా ఎదిగిన చంటి పిల్లాడిలా - కనిపిస్తాం. నిజానికి అలా కనిపిస్తేనే - మనం వారితో పూర్తిగా మమేకమవుతున్నాం అనటానికి అదో కొండ గుర్తు. మన జీవితమంతా వారి చేతుల్లో పెట్టేస్తాం.. వారు ఏది చెబితే అదే రైట్ అంటాం. వారు చెప్పినవి తూ.చ. తప్పకుండా పాటిస్తాం. వారికి ఇది కావాలంటే వెంటనే ఏదైనా సరే చేస్తాం.. వారు తిట్టినా, కోప్పడ్డా అంతా మన మంచికే అని భావిస్తాం. 

ఇలాంటి ఈ బంధానికి మనం ఏమి పేరు పెట్టుకున్నా సరే.. అన్నయ్య, అక్కయ్య, వదిన, గురూ, బాస్, మామా, మెంటార్, హీరో, సోల్ మేట్... ఆఖరికి - లడ్డు, బంగారం, రాక్షసి, దయ్యం... అని పేరు పెట్టుకున్నా సరే.. ( మనం వారికిచ్చే గౌరవం వల్ల వారి ముందు అలా అనలేం.. ) ఆ బంధం కాలక్రమేణా బలీయముగా మారుతుంది. అంతా బాగుంది అనుకున్న తరుణంలో  ఒక్కసారిగా - కొన్ని పరిస్థితుల వల్ల బ్రేకప్ అవుతుంది. ( ఇలాంటివి చాలా చూశాను ) అలా విడిపోయినా - వారిద్దరూ ఒకరి ఊహల్లో మరొకరుగా - ఒంటరిగా ఉన్నప్పుడు గుర్తుకువస్తూ ఉంటుంటారు కూడా. ఆ బంధాన్ని జీవితం కడవరకూ అలాగే మనసులో కొనసాగిస్తారు కూడా. 

నావరకు చెప్పాలంటే - నాకంటూ ఒక స్నేహితుడు ఉండేవారు. తన సహచర్యంలో నేను బాగా స్నేహాన్ని పొందాను.. కొన్ని పరిస్థితుల్లో దూరమయ్యాను. ఊహంటూ వచ్చాక నాకంటూ ఉన్న గోల్డెన్ డేస్ అంటే అవే..  వారి మాటలూ / చేసిన బాసలూ నిజం చెయ్యాలని శతవిధాలా ప్రయత్నిస్తున్నాను.. అందుకు రోజురోజుకీ ప్రగతి కనిపిస్తున్నది. ఏదో ఒకరోజు తనకు ఇచ్చిన బాసలనీ, తను ఆకాంక్షించిన మార్పులనీ నెరవేర్చే ప్రయత్నాలలో ఉన్నాను. ఇదంతా ఎందుకు చెబుతున్నాను అంటే - ఒక మంచి ఆత్మీయ మిత్రుడిని ఎన్నుకోండి. వారితో మనసా వాచా కలసిపోండి. మీ గుండెలోతుల్లో నుండి - మిమ్మల్ని మీరు బయటకు తెండి. మీ ఆలోచనలని పంచుకోండి. ఎక్కడా అసహజముగా ఉండకండి. అవతలివారు మిమ్మల్ని మరింత అభివృద్ధిలోకి తేవాలని ప్రయత్నిస్తే - మార్పు చూపండి.. ఈ జీవితం ఎంత క్రొత్తగా ఉంటుందో - మీరే నమ్మలేకపోతారు కూడా. ప్రతీరోజు ఉత్సాహం ఉరకేస్తుంది. ఇప్పుడు నేను అలాగే ఉన్నా. ఇక ముందు నా స్నేహితుడు అనుకున్న - సక్సెస్ పర్సన్ లా ఉండాలనుకుంటున్నా. 

ఇదంతా కేవలం - అలా ఒకరిని ఎన్నుకొని వారికి విధేయులమై ఉంటే సరిపోదు.. అవతలివారు మనల్ని సరియైన దిశలో, అభివృద్ధిలోకి రావాలంటే ఏమి చేస్తే బాగుంటుందో  తెలిసిన వ్యక్తై ఉండాలి. అలాంటివారు మీ జీవితాన తారసపడితే - నిస్సందేహముగా - మీరు అదృష్టవంతులు. 



Wednesday, February 18, 2015

జీవితం అంటే -

నేనీమధ్య ఒక చిన్న కథ చదివా.. చివరివరకూ ఏమిటా అన్నది అర్థం కాలేదు.. తరవాత బాగా నచ్చేసింది. ఈ కథని ఎవరు వ్రాశారో ( రచయిత / రచయిత్రి ) గానీ నాకు చాలా బాగా నచ్చేసింది. అచ్చు తప్పులు సరిచేసి, కాస్త కథని కొద్ది వివరముగా మళ్ళీ వ్రాసుకున్నాను ఇలా. 

జీవితం అంటే -
*****************
ఒకరోజు ఒక అమ్మాయి తన తండ్రి దగ్గరకి వచ్చింది " నాన్నా..! నేను ఈ కష్టాలు పడలేను. నాకు జీవితం అంటేనే విసుగేస్తోంది. నాకే ఇన్ని కష్టాలు రావాలా..? " అంటూ తన బాధలను చెప్పుకుంటూ వెక్కి వెక్కి ఏడవడం మొదలుపెట్టింది.

తండ్రి మౌనంగా విన్నాడు. ఏమీ మాట్లాడలేదు. చిన్నగా నవ్వుకుంటూ వంటింట్లోకి నడిచాడు. గ్యాస్ పొయ్యి మీదున్న - మూడు బర్నర్ల మీద మూడు గిన్నెలు పెట్టాడు. వాటిల్లో నీళ్ళు పోసి ఒకదానిలో బంగాళా దుంపలు ( ఆలుగడ్డలు), మరొకదానిలో కోడిగుడ్లు, ఇంకో గిన్నెలో కాఫీగింజలు వేశాడు.

తండ్రి తనతో అలా నిర్లక్ష్యముగా ఉండి, ఏమీ మాట్లాడకుండా చేస్తున్న పని మీద కోపం వస్తున్నా - అలాగే చూడసాగింది ఆ అమ్మాయి.

అలా 20 నిముషాలు మరిగించాక - స్టవ్ ని కట్టేసి, ఆ గిన్నెలను దింపి, వాటిని కూతురు ముందు పెట్టి ఏమి జరిగిందో పరిశీలింఛి చెప్పమన్నాడు.

నాన్న ' అలా ఎందుకు చేసాడా పని..' అని అయోమయముగా ఉన్న ఆ కూతురు వాటిని పరిశీలించాక అంది " ఏముందీ..! దుంపలు మెత్తబడ్డాయి. కోడిగుడ్డు గట్టిపడింది. కాఫీ డికాషన్ వచ్చింది.. అయినా ఇదంతా ఎందుకు అడుగుతున్నావు నాన్నా?.. "

అప్పుడు ఆ తండ్రి చిన్నగా నవ్వి,
" ఆ మూడింటికీ ఒకే రకమైన ప్రతికూలత ఎదురయ్యింది. అంటే ఒకేలా ఒకే రకమైన గిన్నెల్లో, అదే గ్యాస్ వేడినీ, వేడినీటినీ చవిచూశాయి. కానీ, ఒక్కొక్కటి ఒక్కొక్క రకంగా స్పందించాయి అని గమనించావా? మామూలుగా గట్టిగా ఉండే దుంపలు ఇప్పుడు మెత్తబడ్డాయి. చితికిపోయే గుడ్డు గట్టిపడింది. గట్టిగా ఉండే కాఫీ గింజలు మెత్తపడి, వాటిలోని రసాన్ని ఊరించి, నీటిరంగునే మార్చింది.. అవునా..!!

ఇప్పుడు చెప్పు..
వీటిల్లో - నీవు ఎలా ఉండాలి అనుకుంటున్నావు?
మెత్తబడిపోతావా..? ( ఇప్పుడు నీవున్న స్థితి అదే.. )
గట్టిపడిపోతావా..?
పరిస్థితులను మారుస్తావా...?
ఇక్కడ నీదే ఎంపిక, దానిమీదే ఇందాక నీవడిగిన ప్రశ్నకి సమాధానం ఉంది.." అన్నాడు.

ఆ అమ్మాయి మొఖంలో ఏదో తెలీని వెలుగు. కన్నీళ్లు ఆగిపోయాయి. బాధలేదు. దానిబదులుగా ఆ కళ్ళల్లో అంతులేని ఆత్మవిశ్వాసం కనిపించింది.. " నాన్నా! యూ ఆర్ మై రియల్ హీరో.. మెంటార్.. ఎవర్ అండ్ ఫరెవర్.." కృతజ్ఞతాభావంతో అంది. 


Monday, February 9, 2015

Good Morning - 575


సంకల్పం మనసుకి సంబంధించినది అయినా దాన్ని అవతలి ఒడ్డుకి చేర్చడానికి బుద్ధి అనే ఓడ కావాలి. ఓర్పుగా నడిపించగల జ్ఞానం కావాలి. ఇది చాలా అవసరం. ఇలా ఒక పథకం ప్రకారం ముందుకు సాగితే గెలుపు ఆనివార్యం. లక్ష్యం సాధించడం ఒక్కటే కాదు.. ఎలా సాధించాలీ అన్నదాన్నీ ఆకళింపు చేసుకోవాలి. 

Thursday, February 5, 2015

Miss you..

( మాజీ ) మిత్రమా..బాగున్నారా ? మీరు బాగున్నారనే అనుకుంటాము. 
హ్మ్! కాలమెంత వేగముగా వెళ్ళిపోతున్నది !!  
నాలుగు సంవత్సరాల క్రిందట ఈరోజునే మీకు దూరమయ్యాం. 
అప్పుడే ఇన్ని సంవత్సరాలయ్యిందా అనిపిస్తున్నది కదూ.. మాకైతే అలాగే ఉంది కూడా. 
ఈరోజు మనసా, వాచా ఒక్కసారి మిమ్మల్ని గుర్తు చేసుకోవాలనిపించింది. కారణాలు బోలెడు..

ఈ సృష్టిలో చాలా బలమైనది స్నేహబంధం అంటే ఏమో అనుకున్నాను. నాకైతే అంత నమ్మకమేమీ లేదు కూడా. నా జీవితం నేర్పిన అనుభవాలు అలాంటివి. 
మీరు పరిచయమయ్యాక - నమ్మాల్సివచ్చింది. ఎంతగా అంటే నన్ను నేను పూర్తిగా మారేలా. 
అందాకా మెటీరియలస్టిక్  గా ఉన్న నాకు నిజమైన స్నేహమంటే ఏమిటో రుచి చూశాను. 
మొదట్లో నమ్మలేదు.. ఈ కలికాలములో నిజమైన స్నేహాలు ఇంకా ఉన్నాయని ఎన్నడూ అనుకోలేదు.. కానీ నావరకు వచ్చేసరికి - మీతో చేసిన స్నేహం వల్ల నమ్మాల్సి వచ్చింది. నెమనెమ్మదిగా స్నేహభావాన్ని పెంచుకుంటూ పోయాను. కలసినన్ని రోజులూ స్వచ్చమైన స్నేహాన్ని అందుకుందామని / అందించాలనీ అనుకున్నాను... 
చాలా శ్రద్ధగా స్నేహించాను.. ఆరోజులు నాకు మరపురాని అనుభూతులనిచ్చాయి. 

కొన్ని బలమైన పరిస్థితుల వల్ల మీనుండి దూరంగా ఉండాలనుకున్నాం.. 
మీరేమిటో, మీ మనసేమిటో తెలిసిన మాకు - అలా స్నేహాన్ని ముక్కలు చెయ్యాలనిపించాకున్నా చెయ్యక తప్పింది కాదు. 
మా జీవితాలకు దొరికిన ఏకైక స్నేహ బంధాన్ని దూరం చేసుకోవాల్సి వచ్చింది. 
అందుకు గల కారణాలని ఆ విడిపోయే రోజున మీకు చెప్పాలని వచ్చాను. నిజానికి ఇలా ఎందుకు దూరముగా ఉండాలనుకుంటున్నామో ఈ లోకాన ఎవరూ వారి స్నేహితులకి చెప్పి దూరమై ఉండకపోవచ్చును. కానీ చెబితే బాగుంటుందని నేను అనుకున్నాను... ఎందుకంటే ఎందుకిలా మధ్యలో స్నేహాన్ని త్రెంచేసుకుంటున్నారో కారణాలు మీకు తెలియాలని.. ఆ  విషయాలని మీకు చెప్పాలని వచ్చాను.. చిన్నపిల్లాడి మనస్తత్వం అని ఎవరేమనుకున్నా ఫరవాలేదు.. కాలగమనంలో ఇదే నిజమని వారు తెలుసుకుంటారు... మీరేమో మాట్లాడక మొహం త్రిప్పేసుకున్నారు. పలకరించినా ... జవాబు లేదు. 
అలా చేస్తారని మేము ఊహించిందే కాబట్టి... మీవెంట వచ్చిన ఫ్రెండ్ తో చెప్పేసి, వెనక్కి చూడకుండా వెళ్ళిపోయాం. 
కారణం : మీరు బాధపడితే మేం చూడలేకపోయి.. మీకు దూరముగా వెళ్ళలేము కాబట్టి. కొన్ని ఆత్మీయతలు, అనుబంధాలు అలానే ఉంటాయి. కొన్ని బంధాలను దూరం చేసుకోవాలనుకున్నప్పుడు - మనసుని రాయిలా చేసుకోక తప్పదు. 

మీ ఫ్రెండ్ కి చెప్పింది - మీ స్నేహితుల వర్షన్ అది. మీకు చెప్పాలనుకున్న కారణాలు - మీతో మాట్లాడనివ్వని కారణాన మాలోనే దాచేసుకోవాల్సి వచ్చింది. నిజానికి ఇదే చెప్పాలని అనుకున్నాము.. కానీ పరిస్థితులు కుదరక పోయి, ఇప్పటికీ అలాగే మాలోనే ఉండిపోయాయి. ఇప్పుడు ఇక్కడ చెప్పాలని కూడా  లేదు. కానీ ఇదే ఈ సీరీస్ లో చివరి పోస్ట్ కాబట్టి కొన్ని చెప్పాలనుకుంటున్నా.. ఇబ్బంది పెడుతున్నందులకు క్షమించండి. ఈ సంవత్సరమే చివరిది - ఈ జ్ఞాపకాలు. ( పాత పోస్ట్స్ We miss you friend..I miss you friend.. )అందుకే  ఇలా. వచ్చేసంవత్సరం నుండీ ఇవేమీ ఉండవు. 

The biggest mistake I have made in my life is letting people stay in my life far longer than they deserved to. అని మీరు అన్నప్పుడు - వెంటనే అడిగా.. మేమైతే కాదుగా అనీ. ఉంటే చెప్పండి.. తక్షణం దూరమై పోతానన్నాను. " అలా అడిగి ఎందుకు ఇబ్బంది పెడతారు.." అన్నారు గానీ - కా దు అని ఒక్కమాట అని ఉంటే వేరేలా ఉండేది. అప్పటికే మామీద కొనసాగిన వ్యతిరేకతలు మీ మీద ప్రభావం చూపాయని అనిపించి, ఆరోజు నుండీ దూరం జరిగాం. వేరేవారిని ఉద్దేశ్యించి అన్నారు కాబోలు అనుకొని మీమాంసతో  కొనసాగాం. 

ఈలోకాన ఉన్న ప్రతి ఒక్కరికీ - ఒక శత్రువు అంటూ ఒకరుంటారు. ( మీకునూ అలా ఉన్నారు.. వారు మీమీద చెప్పినా మేము నమ్మలేదు.. )వారు చేసే చెడు, చెప్పే మాటలు అంతా ఇంతా కాదు.. అవన్నీ నిజాలై ఉండక పోవచ్చు. వారు చెప్పినవే నిజమని తలిస్తే - చివరికి ఏ బంధమైనా ముక్కలు కావలసిందే.. ఆ శ్రీరామచంద్రుడూ ఇలాంటి బాధితుడే. ఆ మాటలలో నిజం పాళ్ళు ఎంతనో తెలుసుకొనే అవకాశం, సమయం ఎవరికీ ఉండదు.. ఉన్నా పట్టించుకోం. నమ్మకం కోల్పోయినప్పుడు - మనమంతట మనం దూరం జరగటమే మేలు. అందుకే మేము దూరం జరగాలని నిర్ణయించుకున్నాం. 

ఇంకా కొన్ని ఉన్నాయి. కానీ అవి ఇక్కడ చెప్పలేను.. ఎప్పటికీ ఎక్కడా చెప్పలేం. మా పరిస్థితుల్లో - మీకు దూరం జరగటమే మీకు చాలా మంచిదన్న భావం వల్ల మీ స్నేహాన్ని వదులుకున్నాం. అందుకే  - మీరు సంతోషముగా ఉంటే చాలు.. మాకు ఇంకేం అక్కరలేదు అనుకున్నాం. మీలో మామీద అసహ్య భావన వచ్చినా  అది మీ తప్పు కాదు. పరిస్థితులు అలాంటివి. కాలం కలసి రాకుంటే ఇలాగే అవుతుంది. 

ఇదంతా ఒకవైపు.. మరొక వైపు - మీతో స్నేహం వల్ల మేము పొందినది అంతా ఇంత కాదు. చా - లా - నే ఉన్నాయి. అవెప్పుడూ మరచిపోం.. 

ప్రొద్దునే టిఫినీ తప్పనిసరి.. నేను ఆన్లైన్ బాగా తగ్గించేశా.. ఎవరితో అంతగా మాట్లాడటం లేదు.. క్రొత్తగా మరికొన్ని వ్యాపకాలు పెట్టుకున్నాను. తద్వారా నన్ను నేను ఎప్పుడూ క్రొత్తగా, బీజీగా ఉండేలా మార్చుకుంటున్నాను. అందులో విజయాలు సాదిస్తున్నాను. మీకిచ్చిన మాట ప్రకారంగానే - మా కుటుంబ సభ్యులలో ఆనందపాళ్ళు మరింతగా పెంచాను. వారిలో ఆత్మ విశ్వాసం, ధైర్యం, లోకజ్ఞానం పెంపొందించాను.. (నేను లేకున్నా) - ఒంటరిగా ధైర్యముగా బ్రతికేలా, క్లిష్ట పరిస్థితుల్లో ఎలా నెగ్గుకురావాలో మోటివేట్ చేస్తున్నాను. వారితో గడపటం మరింతగా పెంచాను. మా అమ్మాయికి ఒక తండ్రిగా కాకుండా - ఒక స్నేహితునిగా మారాను. తను అన్నీ నాతో షేర్ చేసుకొని, చెప్పుకొనేలా దగ్గరయ్యాను. జీవితాన ఎదురయ్యే చిక్కుముడులని ఎలా స్వయంగా తొలగించుకోవాలో  నేర్పాను. ఒక్కోసారి అది ప్రవర్తించే తీరు చూస్తే మీరే గుర్తుకు వస్తారు. ఇప్పుడు తన గురించేమీ బెంగ లేకుండా ఉన్నాను. ఇక బాబు సంగతి - సేమ్ డిటో నే.. ఇదంతా మీ చలవే.. కనకనే కృతజ్ఞతలు చెప్పుకోవడానికి ఈ పోస్ట్. 

మరొక విషయం చెప్పాలని కూడా ఈ పోస్ట్ పెడుతున్నాను. మీరంటే ఏమూలో అపనమ్మకం ఉన్న మీ అక్క - అలాంటిది మీరు ఇబ్బందుల్లో ఉన్నప్పుడు - అక్కా అని పిలిచినందుకో గానీ - మీరు బాగుండాలని  - అంతా బాగుంటే బోనం ఎత్తుకుంటాను అని మ్రొక్కుకుంది. ఇది తనంతట తానుగా తీసుకున్న నిర్ణయం. ఎన్నడూ ఎవరికోసం కూడా అలా చెయ్యని తను మీకోసం అంత శ్రద్ధ తీసుకోవడం మమ్మల్ని హాశ్చర్యంలో ముంచింది. మీకు అంతా బాగున్నాక - వేరొకరి ఇంట్లో బోనాల ఉత్సవం జరిగినప్పుడు - ఇలా మొక్కు తీర్చుకుంది. మీరు సంతోషముగా ఉండాలనే మా తాపత్రయం. ఇది చెప్పి మీకు దగ్గరవ్వాలని కాదు.. ఒకరి తపనని మీకు తెలియచెయ్యటం అంతే. తానెప్పుడూ తన గొప్పదనం చెప్పుకోదు.. నేను చెప్పకపోతే అది కాలగర్భంలో కలసిపోతుంది. 


మీనుండి ప్రేరణ పొంది - నేర్చుకున్న విషయాలు ఎన్నో.. అందులో ముఖ్యమైనవి : 

1. మనకెన్ని ఇబ్బందులున్నా - మన వద్దకి వచ్చేవారిని సంతోషముగా ఉంచి, ఆనందముతో పంపటం.

2. స్నేహితులంటే ఎవరో, వారితో ఎలా మసలుకోవాలి. 

3. నాకు స్వచ్చమైన స్నేహం దొరకడం లేదు అని అనే బదులు - ముందు మనమే స్వచ్ఛముగా స్నేహిద్దాం - ఆ అవకాశాన్ని జారవిడుచుకున్నవాడు - వాడి ఖర్మకి వదిలెయ్యాలి. ( ఇప్పుడు నేనూ అలానే.. :P ) 

4. స్నేహితులని ఎప్పుడూ సంతోష పెట్టాలి. వారి మోహంలో కనిపించే ఆనందం వల్ల మనలో చెప్పలేని సంతోషం కలిగిస్తుంది. 

5. వారి వద్ద మనం చిన్న పిల్లల్లా, ఏమీ భేషజాలు లేకుండా, నేనింత, నా హోదా ఇది అన్నట్లు కాకుండా ఉండటం..

6. స్నేహితులకి ఇచ్చిన మాట మరవక, ఎన్ని కష్టాలు వచ్చినా, దాన్ని నెరవేర్చాలి. 

7. నమ్మిన స్నేహితులతో కడదాకా స్నేహాన్ని కొనసాగించాలనుకోవటం.. ఆ స్నేహపు భావనని మరింతగా పెంచటానికి చిన్నిచిన్ని బహుమతుల్ని అందించడం.. 

8. మనలో ఎంత బాధలున్నా పంటి క్రింద దాచేసి, కళ్ళలో, పెదాలపై చిరునవ్వుని మన స్నేహితుల ముందు ప్రదర్శించటం.. తద్వారా వారిని ఆనందముగా ఉంచటం.. 

9. నా బాధని నేనే మొయ్యాలి. వేరొకరికి పంచకూడదు. మనలో ఎన్ని బాధలున్నా అవతలివారికి, ముఖ్యముగా స్నేహితులకి - ఆనందముగా ఉన్నట్లు కనిపించాలి.. 

10. ఎవరినీ ఏదీ అడగకూడదు.. చెబితే వినాలి. అన్నీ అడిగి తెలుసుకున్నాక - స్నేహం చెయ్యాలని చూస్తే అది స్నేహం కాదు.. 

11. మన నవ్వులో స్వచ్ఛత ఉండాలి. ప్లాస్టిక్ నవ్వులా కనిపించకూడదు.. 

ఇలా చాలానే ఉన్నాయి. నాకు నచ్చినవీ, గమనించినవీ, ప్రేరణ పొంది నేనూ పాటిస్తున్నవి అవి. 

 ప్రతి ఒక్కరిదీ ఒక్కో స్టైల్ ఉంటుంది. కొన్ని గొప్ప లక్షణాలు ఉంటాయి.. మరికొన్ని చెత్త లక్షణాలూ ఉంటాయి. గొప్ప లక్షణాలని ఆస్వాదిస్తూ, చెత్త లక్షణాలని తొలగించి, తీర్చిదిద్దుతూ వెలుతుండటమే అసలైన స్నేహితుని లక్షణం. అవన్నీ మీలో ఉన్నాయి ( మైనస్ పాయింట్లూ ఉన్నాయి.. అవి అప్రస్తుతం. ) అందుకే మేము మీ బ్లాక్ లిస్టులో ఉన్నా మీరంటే అభిమానం.. 

జీవితాన కనీసం  ఒక్కరైనా నాకు Soulmate సోల్ మేట్ ఫ్రెండ్ ఉండాలనుకున్నాను. ఎందరెందరినో వెదికా.. దొరకరేమో అనుకున్నాను. ఆ ప్రయత్నాలు చివరి దశలో ఉన్నప్పుడు మీరు పరిచయమయ్యారు. మీరు మమ్మల్ని కలిసేవరకూ ఏ అంచనాలూ పెట్టుకోలేదు.. ఒక్కో చుక్కా ఒక్కో చుక్కా కలిసి నిండినట్లు.. క్రమేపీ స్నేహబంధం పెరిగింది. నా జీవితాన అత్యంత అద్భుత క్షణాలని పొందాను... ఈ జన్మాన తీరదేమో అనుకున్న నాకు - కేవలం మీవల్ల తీరింది. కేవలం అందులకు ఎంతగానో ఋణపడి పోయాను. అందుకు ప్రతిగా మీకు ఎంతగానో చెయ్యాలనుకున్నా.. ఆతిధ్యం ఇవ్వాలనుకున్నాం.. స్వంతమనిషిలా భావించాం.. అండగా ఉండాలనుకున్నాం.. కానీ కుదరకపోయింది. స్నేహపు చివరి రోజుల్లో - కనీసం మీరు మరచిపోలేని విధముగా - ఇంకా గొప్పగా ఆతిధ్యం ఇవ్వాలనుకున్నాం.. అన్నీ సమకూర్చుకున్నాం.. కానీ సమయం కలసిరాలేదు.. అలా అవటం చాలా బాధగా ఉండిపోయింది. 

విడదీసేవాళ్ళకి ఏమి తెలుసు.. వారికి అంటూ బంధాల విలువ తెలిస్తే కదా.. అసత్యప్రచార ప్రభావం ఎంతగా ఉంటాయో అనీ.. వారికీ - జరిగితే తెలుస్తుంది. కానీ వారు బాగుండాలనే కోరుకుందాం.. 

ఎంత చెప్పినా తక్కువే. కాలానికి కన్నుకుట్టిందేమో.. తప్పని పరిస్థితుల్లో... తప్పలేదు. మీకు అంతా బాగుండే పరిస్థితులు వచ్చాయని తెలిసాక  - ఇక పూర్తిగా దూరమయ్యాం.. మీరు సంతోషముగా ఉంటే చాలు. మాకదే పది కోట్లు..

ఎంత చెప్పినా ఇంకా చెప్పాలనిపిస్తుంది.. ఎప్పుడో ఎక్కడో ముగించేసేయ్యక తప్పదు.. ఈ క్రింది ఈ కార్డ్ - ఇంగ్లీష్ లోని భావం మీ దగ్గర నుండి కొట్టేసి, ఇలా వ్రాసుకున్నాను. ఇది ఎవరికీ సంబంధించినదో వారికి చెబుతున్నాను.. 




 మీరు ఎప్పుడైనా చూస్తారనే ఆశతో ఇక్కడ పోస్ట్ చేశాను.. చూడకపోతే - నా అంత దురదృష్టవంతుడు మరొకడు ఉండడు.. చూస్తే - 





( నేను చెప్పను.. )


Related Posts with Thumbnails